Fjárfesting  í sjávarútvegi nam rúmlega 22 milljörðum króna á árinu 2018, um þriðjungi minni en árið áður. Var fjárfesting á árinu engu að síður mikil í sögulegu samhengi enda var árið 2017 metár hvað fjárfestingu varðar, að minnsta kosti á þeim tíma sem liðinn er frá því að lög um stjórn fiskveiða frá árinu 1990 tóku gildi. Að þessu sinni var fjárfesting í fiskvinnslu meiri en fiskveiðum, öfugt við fyrri ár þegar meginþungi fjárfestinga lág í útgerðinni. Nam fjárfesting í fiskvinnslu ríflega 13 milljörðum króna samanborið við rúma 9 milljarða í fiskveiðum. Svigrúm sjávarútvegs til fjárfestingar er lykillinn að því að sjávarútvegur geti haldið áfram á þeirri jákvæðu vegferð sem hann hefur verið á í umhverfismálum og dregið enn frekar úr olíunotkun og minnkað sótspor sitt.

Skýring: Hér átt við nettó fjárfestingu, sem er fjárfesting að frádregnum seldum eignum. Tölur Hagstofunnar fyrir 2016 til 2018 eru bráðabirgðatölur.

Heimild: Hagstofa Íslands

Meðalaldur íslenskra togara var um 20 ár um síðustu aldamót en 30 árið 2016. Áhrif mikilla fjárfestinga á undanförnum árum, sem má að mestu leyti rekja til nýsmíði, eru vel sjáanleg á myndinni. Sú endurnýjun hefur haft þau áhrif að meðalaldur togaraflotans hefur lækkað um 6 ár. Meðalaldur annarra skipa hefur þó haldið áfram að hækka og er fiskiskipaflotinn í heild að jafnaði 31 árs samanborið við um 20 ára um síðustu aldamót. Hér ber þó að hafa í huga að aldur fiskiskipa segir ekki alla söguna, því víða hefur endurnýjun átt sér stað í tækjum og tólum um borð.

Heimild: Hagstofa Íslands