Útflutningsverðmæti eldisafurða nam rétt rúmlega 10 milljörðum króna í janúar. Þetta er stærsti mánuður frá upphafi í útflutningi á eldisafurðum, hvort sem talið er í verðmætum eða magni. Miðað við janúar í fyrra nemur aukningin 26% í krónum talið. Þegar leiðrétt er fyrir gengisbreytingum nemur hún 29%, en gengi krónunnar var að jafnaði rúmlega 2% sterkara nú í janúar en fyrir ári.
Aukninguna í janúar má að öllu leyti rekja til laxeldis. Útflutningsverðmæti eldislax nam um 9,6 milljörðum króna í janúar, sem er 33% aukning frá sama mánuði í fyrra á föstu gengi. Útflutningsverðmæti silungs, sem að langstærstum hluta er bleikja, stóð nánast í stað milli ára en samdráttur var í öðrum tegundaflokkum eldisafurða.
Áskoranir og tækifæri
Rétt er að hafa í huga að hluti þessa mikla útflutnings í janúar skýrist af rekstrarlegum áskorunum hjá sumum eldisfyrirtækjum sem þurftu að grípa til snemmbúinnar slátrunar. Slíkt undirstrikar að þrátt fyrir mikil tækifæri stendur greinin frammi fyrir raunverulegum rekstraráskorunum. Til að tryggja stöðugan og sjálfbæran vöxt þarf að huga markvisst að starfsumhverfi hennar.
Fiskeldi er nú þegar orðið mikilvæg stoð í efnahagslegu gangverki þjóðarinnar. Verðmæti útflutnings hefur aukist jafnt og þétt eins og ráða má af myndinni hér að ofan. Greinin er enn að stækka og ná fótfestu og gera má ráð fyrir því að hlutur fiskeldis geti enn vaxið og lagt sitt af mörkum til bætts þjóðarhags. Til þess þarf að bæta framleiðni, skýra regluverk og auka þar með fyrirsjáanleika og treysta um leið rekstrarumhverfið. Þar liggja bæði tækifærin og áskoranirnar.
