Eldi

Fiskeldi

Í þúsundum tonna

Á myndinni má sjá framleiðslu í fiskeldi á ári hverju á þessari öld. Árlega hefur í kringum 50 þúsund tonnum af eldisfiski verið slátrað undanfarin ár. Langstærsta tegundin þegar kemur að framleiðslu á eldisfiski er lax. Þar á eftir kemur bleikja, svo regnbogasilungur og Senegalflúra. Í dag er ekki eldi á öðrum tegundum. Á árinu 2022 bættist við ný tegund, Gullinrafi, en engin framleiðsla var á honum árið 2023 og óvíst er með framhald á eldi þeirrar tegundar. Árið 2023 var fjórða árið í röð frá árinu 1992 sem ekkert eldi var á þorski, en það var nokkuð fyrirferðarmikið á árunum 2005 til 2012.

Heimild: MAST

Eldi eftir umdæmum

Í þúsundum tonna

Umfang fiskeldis er mjög mismunandi eftir landshlutum. Mest er það á Vestfjörðum þar sem framleidd voru 36,3 þúsund tonn árið 2023. Næst mest er eldið á Austfjörðum, en þar voru framleidd um 5,2 þúsund tonn á árinu 2023. Það er töluvert minna en síðustu ár, en þann samdrátt má rekja til afleiðinga af útbreiðslu ISA-veirunnar árið 2021 og viðbrögðum vegna hennar . Þriðja stærsta svæðið er Reykjanes þar sem rúmlega 5,2 þúsund tonn af eldifiski voru framleidd á árinu 2023. Á Reykjanesi ræður bleikjan ríkjum en lax er langstærsti hluti fiskeldis á Vestfjörðum og Austfjörðum. Rétt er að hafa í huga að umfang fiskeldis byggist ekki eingöngu á fjölda tonna sem framleidd eru á hverjum stað. Bleikja og lax eru að sjálfsögðu misstórir fiskar, framleiðsluferli er mismunandi og Suðurland er langstærst í klaki og seiðaræktun fyrir aðrar eldisstöðvar. Þar að auki er kynbótastöð fyrir bleikju á Norðurlandi vestra og eystra, sem sér öllum öðrum bleikjustöðvum fyrir hrognum.

Heimild: MAST

Laxeldi á landi og í sjó

Í þúsundum tonna

Aukningin sem orðið hefur á laxeldi má að langstærstum hluta rekja til laxeldis í sjó. Framleiðsla úr sjókvíum var um 41 þúsund tonn á árinu 2023. Nokkur stígandi hefur verið í eldi á laxi á landi en það er þó margfalt minna en eldi í sjó. Á árinu 2023 komu 2,7 þúsund tonn af laxi úr landeldi. Ef litið er til heimsins alls, þá er eldi á laxi á landi hlutfallslega mikið hér á landi en hafa verður í huga að 99% af laxeldi í heiminum er í sjó.

Heimild: MAST

Fjöldi laxaseiða til áframeldis í sjókvíum og lax til slátrunar 2 árum síðar

Fjöldi laxaseiða er í milljónum en lax í þúsundum tonna

Mikil endurnýjun og uppbygging hefur orðið á seiðastöðvum á undanförnum árum sem skilar sér í stöðugt fleiri seiðum til áframeldis. Myndin hér að ofan sýnir heildarfjölda laxaseiða sem fóru til áframeldis í sjókví og magn þess sem slátrað var tveimur árum síðar. Alls nam fjöldi útsettra laxaseiða 13-14 milljónum árin 2022 og 2023. Miðað við þann fjölda hefur Matvælastofnun áætlað að magn lax upp úr sjó verði um 50 þúsund tonn árin 2024 og 2025.

Heimild: MAST