Losun koltvísýrings

Losun koltvísýrings hjá sjávarútvegi og matvælaiðnaði

Í þúsundum tonna

Heildarlosun á CO2 frá sjávarútvegi og matvælaiðnaði hefur verið ríflega helmingi minni á undanförnum árum en hún var undir lok síðasta áratugar. Langstærsti hluti þessa er vegna minni olíunotkunar í sjávarútvegi, eins og sjá má í umfjöllun í hlutanum um olíunotkun. Fiskeldi er talið með í þessum tölum um fiskveiðar, en umsvif þess hafa stóraukist á undanförnum árum. Margir samverkandi þættir skýra árangurinn, en hæst ber fiskveiðistjórnunarkerfið enda gætir áhrifa þess á flesta aðra þætti sem koma við sögu. Kerfið sjálft hefur eflst og felur í sér hagræna hvata til að fjárfesta í nýjum tækjum og búnaði en auk þess hefur aukin vitund um loftlagsmál ýtt undir breyttri orkunotkun og fjárfestingu í sparneytnari skipum.

Skýring: Í tölum um sjávarútveg og matvælaframleiðslu á myndinni er fiskeldi og öll önnur matvælaframleiðsla. Tölur úr losunarbókhaldi gróðurhúsalofttegunda samkvæmt uppgjörsaðferð Eurostat sem gerir ekki greinarmun á staðsetningu losunar, heldur eingöngu hvort að aðili sem er ábyrgur fyrir losun tilheyri hagkerfi Íslands.

Heimild: Hagstofa Íslands

Losun koltvísýrings frá hagkerfi Íslands

Í þúsundum tonna

Þrátt fyrir háværa umræðu um loftslagsbreytingar og skaðleg áhrif gróðurhúsalofttegunda, jókst útblástur á þeim mikið hér á landi fram til ársins 2018 þegar hún náði hámarki. Var heildarlosun á CO2 frá hagkerfinu næstum tvöfalt meiri á árinu 2018 en hún hafði verið undir lok síðasta áratugar. Þessi þróun er í takt við aukin umsvif í hagkerfinu á tímabilinu, sem hafa mikil áhrif á útblástur á CO2. Að sama skapi hefur dregið úr losun á CO2 á undanförnum árum vegna minni umsvifa, sér í lagi frá flugsamgöngum. Árið 2020 er vitanlega sérstakt vegna áhrifa COVID-19 en líkt og myndin hér gefur til kynna jókst losun gróðurhúsalofttegunda árið 2021 í öllum liðum að undanskildum sjávarútvegi og flugsamgöngum. Á þessum tímabili hefur losun á CO2 frá sjávarútvegi og matvælaframleiðslu dregist nær statt og stöðugt saman. Það þýðir þó ekki að dregið hafi úr framleiðslu, öðru nær.

Heimild: Hagstofa Íslands

Losun koltvísýrings frá hagkerfi Íslands og hlutdeild sjávarútvegs og matvælaframleiðslu

Í þúsundum tonna

Heildarlosun á CO2 frá hagkerfinu hefur aukist verulega á undanförnum áratatugum. Þessi aukning er í takt við aukin umsvif í hagkerfinu sem hafa mikil áhrif á útblástur á CO2. Á sama tímabili hefur losun á CO2 frá sjávarútvegi og matvælaframleiðslu dregist saman og hefur hún á undanförnum árum að jafnaði verið um 55% minni en hún var undir lok síðasta áratugar. Það er þó ekki vegna þess að dregið hafi úr framleiðslu, öðru nær. Hefur því verulega dregið úr hlutdeild sjávarútvegs og matvælaiðnaðar í heildarlosun á CO2 í hagkerfinu, að árinu 2020 undanskildu vegna COVID-19. Á fyrstu árum þess tímabils sem hér um ræðir var hlutdeildin að jafnaði 35% en hún hefur verið um 9% að jafnaði á undanförnum árum.

Heimild: Hagstofa Íslands