Fiskeldi: Hátt í 60% aukning í ágúst

Útflutningsverðmæti eldisafurða nam rúmlega 3,4 milljörðum króna í ágúst. Það er hátt í 60% aukning miðað við ágúst í fyrra á föstu gengi. Á fyrstu átta mánuðum ársins er útflutningsverðmæti eldisafurða þar með komið í 30,7 milljarða króna. Það hefur aldrei verið meira á tilgreindu tímabili og er um 22% aukningu að ræða frá sama tímabili í fyrra á föstu gengi. Þetta má sjá í fyrstu bráðabirgðatölum Hagstofunnar um vöruskipti í ágúst sem birt voru í vikunni.

Í fyrstu bráðabirgðatölum Hagstofunnar er útflutningsverðmæti eldisafurða í heild aðeins birt og því liggur ekki fyrir sundurliðun niður á einstaka tegundir í ágústmánuði. Af þessum sökum eru verðmæti fyrir árið 2024 á myndinni hér að ofan ekki sundurliðað eftir tegundum, líkt og fyrri ár. Vafalaust má rekja þessa myndarlegu aukningu í ágúst til laxeldis, líkt og mánuðina á undan. Sé tekið mið af fyrstu sjö mánuðum ársins var vægi lax rúmlega 82% af heildarverðmæti útfluttra eldisafurða samanborið við 77% á sama tímabili í fyrra.

Stórir mánuðir í vændum

Eins og fjallað var um nýlega á Radarnum, þá er útflutningur eldisafurða yfirleitt í hóflegri kantinum yfir sumarmánuðina, þar sem þá er helsti vaxtartími lax sem alinn er á sjó. Framleiðslan færist svo í aukana á haustin og miðað við áætlanir fyrirtækja má reikna með að næstu mánuðir verði stórir þegar kemur að útflutningi á eldisafurðum, sér í lagi á laxi. Ef allt gengur eftir má reikna með að fiskeldi muni skila meiri gjaldeyristekjum í þjóðarbúið í ár en nokkru sinni fyrr.